काठमाडौं । नेपाल दूरसञ्चार प्राधिकरणले मोबाइल सेवाको गुणस्तर सुधार, उपभोक्ता हित संरक्षण र आधुनिक प्रविधिको प्रभावकारी उपयोग सुनिश्चित गर्न दूरसञ्चार सेवा प्रदायक कम्पनीहरूका लागि आठबुँदे निर्देशन जारी गरेको छ।
प्राधिकरणले दूरसञ्चार ऐन, २०५३ को दफा १५ बमोजिम साउन २१ गते गरेको निर्णयअनुसार सेवा प्रदायकहरूलाई सेवाको गुणस्तर, नेटवर्कको विश्वसनीयता तथा ग्राहक सेवा अनुभवमा उल्लेखनीय सुधार गर्न निर्देशन दिएको हो।
निर्देशनअनुसार सेवा प्रदायकहरूले तोकिएका गुणस्तर मापदण्ड पूरा भए–नभएको विवरणसहित नियमित प्रतिवेदन प्राधिकरणमा पेस गर्नुपर्नेछ। साथै, ग्राहकका गुनासा २४सै घण्टा सम्बोधन गर्न कृत्रिम बुद्धिमत्ता (एआई) लगायतका आधुनिक प्रविधिको प्रयोग गर्न पनि भनिएको छ।
प्राधिकरणले गुणस्तरीय सेवा नपुगेका क्षेत्रलाई प्राथमिकतामा राखेर नेटवर्क विस्तार गर्न तथा सेवा पुगेका स्थानको विवरण प्रत्येक तीन महिनामा नेपालको नक्सामा अद्यावधिक गर्नुपर्ने व्यवस्था गरेको छ।
त्यस्तै, देशभर फोरजी सेवाको गुणस्तर सुधार गर्दै प्रमुख सहरहरूबाट फाइभजी सेवा विस्तारका लागि चरणबद्ध कार्ययोजना पेस गर्न सेवा प्रदायकहरूलाई निर्देशन दिइएको छ।
फ्रिक्वेन्सी तथा दूरसञ्चार पूर्वाधारको अधिकतम उपयोग गरी दोहोरो लगानी घटाउन, साइबर सुरक्षा सुदृढ बनाउन नियमित सुरक्षा परीक्षण (सिक्युरिटी अडिट) सञ्चालन गर्न र विपद् व्यवस्थापन योजना तयार राख्न पनि प्राधिकरणले आग्रह गरेको छ।
यस्तै, बजारमैत्री र पारदर्शी शुल्क प्रणाली लागू गर्न लागत विश्लेषणका आधारमा नयाँ सेवा शुल्क प्रस्ताव पेस गर्नुपर्ने व्यवस्था गरिएको प्राधिकरणका प्रवक्ता मिनप्रसाद अर्यालद्वारा जारी विज्ञप्तिमा उल्लेख छ।
