काठमाडौं । राष्ट्रपति रामचन्द्र पौडेलले बाँझो जमिन राख्ने प्रवृत्तिको अन्त्य गर्दै कृषिलाई आधुनिक, व्यावसायिक र उत्पादनमुखी बनाउनुपर्नेमा जोड दिएका छन्।
२३औँ राष्ट्रिय धान दिवस–२०८३ का अवसरमा शुभकामना सन्देश जारी गर्दै राष्ट्रपति पौडेलले कृषिमा आधुनिकीकरण गर्न सके विदेश पलायन भइरहेका जनशक्तिलाई स्वदेशमै रोक्न र धान तथा चामलको आयात घटाउन सकिने बताए।
उनले श्रम गर्ने संस्कृतिको विकाससँगै धान उत्पादनमा आत्मनिर्भर बन्नुपर्ने आवश्यकता औंल्याउँदै कृषि जीविकोपार्जनको माध्यम मात्र नभई सम्मानजनक र आकर्षक व्यवसायका रूपमा विकास गर्न सबैलाई आग्रह गरे। यसका लागि सम्बन्धित निकायले आवश्यक नीति, योजना र सहयोगमा ध्यान दिनुपर्ने उनको भनाइ छ।
राष्ट्रपति पौडेलले असार महिना धान रोप्ने र ‘मानो रोपेर मुरी फलाउने’ समय भएकाले नेपाली जीवनशैली, माटो र प्रकृतिसँग गहिरो सम्बन्ध रहेको उल्लेख गरे। हिलोमा धान रोप्ने, दही–चिउरा खाने र असारे संस्कृति मनाउने परम्पराले नेपाली समाजको मौलिक पहिचान झल्काउने उनले बताए।
जलवायु परिवर्तनका कारण धान उत्पादनमा बढ्दो चुनौती देखिएको उल्लेख गर्दै उनले उत्पादन र उत्पादकत्व बढाउन सरकार, किसान र सरोकारवाला सबै पक्ष सचेत र सक्रिय हुनुपर्ने आवश्यकता औंल्याए।
राष्ट्रपतिले नेपालको धानखेती अझै पनि वर्षामा निर्भर रहेकाले खेतीयोग्य जमिनमा सिँचाइ सुविधा विस्तार गर्नु राज्यको प्रमुख दायित्व भएको बताए। वर्षा राम्रो हुँदा उत्पादन बढ्ने र कम वर्षा हुँदा उत्पादन घट्ने अवस्थाको अन्त्य गर्न दीर्घकालीन सिँचाइ पूर्वाधारमा लगानी आवश्यक रहेको उनको भनाइ छ।
विसं २०६१ देखि प्रत्येक वर्ष असार १५ लाई राष्ट्रिय धान दिवसका रूपमा मनाइँदै आएको छ। यस वर्ष ‘जलवायुमैत्री प्रविधि, धानमा आत्मनिर्भरता र समृद्धि’ भन्ने नारासहित देशभर धान दिवस मनाइँदै छ।
