काठमाडौं । बजारमा गोलभेँडाको मूल्य लगातार घट्न थालेपछि किसान मारमा परेका छन्। उत्पादन लागतसमेत उठाउन मुस्किल पर्ने अवस्था आएपछि किसानले उचित मूल्यको माग गरेका छन्।
कालीमाटी फलफूल तथा तरकारी बजार विकास समितिले आइतबार सार्वजनिक गरेको अधिकतम थोक मूल्यसूचीअनुसार ठूलो नेपाली गोलभेँडा प्रतिकिलो ५० रुपैयाँ, टनेलमा उत्पादन भएको सानो गोलभेँडा २० रुपैयाँ र स्थानीय सानो गोलभेँडा मात्र १० रुपैयाँमा सीमित भएको छ।
विशेषगरी स्थानीय गोलभेँडाको मूल्य एक दशकयताकै न्यून तहमा झरेको भन्दै किसानले चिन्ता व्यक्त गरेका छन्। मल, बीउ, विषादी, सिँचाइ, ढुवानी र मजदुरी खर्च बढिरहेका बेला बजार मूल्य भने लगातार घट्दै जाँदा उत्पादन लागतसमेत उठाउन कठिन भएको उनीहरूको गुनासो छ।
किसानका अनुसार उत्पादन बढ्नु, एकैपटक बजारमा धेरै परिमाणमा गोलभेँडा आउनु, भण्डारणको अभाव र बजार व्यवस्थापन कमजोर हुनु मूल्य घट्नुका प्रमुख कारण हुन्। पर्याप्त चिस्यान भण्डार र प्रशोधन उद्योग नहुँदा किसान बाध्य भएर जुन मूल्य पाए पनि उत्पादन बेच्नुपर्ने अवस्था छ।
यता उपभोक्ताले बजारमा थोक मूल्यअनुसार सस्तोमा तरकारी नपाइरहेको गुनासो गरिरहेका छन्। थोक बजारमा मूल्य घटे पनि खुद्रा बजारमा त्यसको प्रभाव पूर्ण रूपमा नदेखिएको उपभोक्ताको भनाइ छ।
कृषि जानकारहरूका अनुसार उत्पादन र बजारबीच सन्तुलन कायम गर्ने नीति, भण्डारण तथा प्रशोधनको व्यवस्था र किसानलाई न्यूनतम समर्थन मूल्यको सुनिश्चितता नगरेसम्म यस्ता समस्या दोहोरिरहनेछन्।
गोलभेँडासँगै कालीमाटी बजारमा भिन्डी, भन्टा, करेला, चिचिण्डो र केही अन्य मौसमी तरकारीको मूल्य पनि तुलनात्मक रूपमा न्यून कायम भएको छ।
