काठमाडौँ । समस्याग्रस्त सहकारी व्यवस्थापन समितिले समस्याग्रस्त घोषित २३ वटा सहकारी संस्थाका सञ्चालकहरूले लुकाएको हुन सक्ने सम्पत्तिबारे सूचना उपलब्ध गराउन सर्वसाधारणसँग आग्रह गरेको छ।
समितिले ती सहकारीका सञ्चालकहरूको नामसहितको विवरण सार्वजनिक गर्दै उनीहरूले सहकारीको बचत रकम वा सम्पत्ति हिनामिना गरी परिवार, आफन्त, नातागोता वा अन्य व्यक्तिको नाममा सम्पत्ति तथा रकम लुकाएको जानकारी भए समितिलाई सूचित गर्न अनुरोध गरेको हो।
समितिद्वारा जारी सूचनामा भनिएको छ, “सार्वजनिक भएका सञ्चालकहरूले सहकारीको बचत रकम वा सम्पत्ति हिनामिना गरी परिवार, आफन्त, नातागोता वा अन्य व्यक्तिको नाममा सम्पत्ति वा रकम लुकाएको जानकारी भएमा यस कार्यालयमा सूचना गरिदिनुहुन सम्बन्धित सबैमा अनुरोध छ।”
समितिले समस्याग्रस्त सहकारी संस्थाका सञ्चालकहरूलाई सम्बन्धित संस्थाको दायित्व फरफारक, ऋण असुली, सम्पत्ति तथा अन्य स्रोत–साधनको पहिचान गरी त्यसको व्यवस्थापन गर्न तथा नियमित रूपमा समितिको सम्पर्कमा रही बचत फिर्ता, दायित्व व्यवस्थापन र नियमनसम्बन्धी कार्यमा सहयोग गर्न पनि आग्रह गरेको छ।
सूचनामा समितिको निर्देशन र आग्रहलाई बेवास्ता गरे कानुनबमोजिम कारबाही गरिने चेतावनीसमेत दिइएको छ।
यस्तै, सार्वजनिक गरिएको विवरणमा कुनै त्रुटि, फरक वा अद्यावधिक गर्नुपर्ने विषय भए समितिको कार्यालयमा सम्पर्क गर्न पनि आग्रह गरिएको छ।
समितिले समस्याग्रस्त घोषित २३ वटा सहकारी संस्थाका सञ्चालकहरूको विवरणसमेत सार्वजनिक गरेको जनाएको छ।
