काठमाडाैं । नेपााल टेलिकमले जीएसएम प्रिपेड तथा पोस्टपेड मोबाइल सेवामा उपलब्ध तथ्यांक सुविधासम्बन्धी नयाँ व्यवस्था लागू गरेको छ। अब तथ्यांक प्याक खरिद गरेका ग्राहकहरूले नियमित शुल्क भुक्तानी सुविधा आफैं सक्रिय वा निष्क्रिय गर्न सक्नेछन्।
यसका लागि ग्राहकले आफ्नो मोबाइलबाट ८४४४३ डायल गर्नुपर्नेछ। त्यसपछि ४ नम्बर छनोट गरी सुविधा सक्रिय गर्न १, निष्क्रिय गर्न २ र अवस्थाबारे जानकारी लिन ३ थिच्न सकिनेछ।
तथ्यांक उपयोगसम्बन्धी नयाँ व्यवस्था
कम्पनीले विभिन्न प्रकारका आकर्षक तथ्यांक प्याक उपलब्ध गराउँदै आएको छ। तथ्यांक प्याक खरिद गर्ने ग्राहकलाई अब प्याकको ९० प्रतिशत तथ्यांक खपत भएपछि सन्देशमार्फत जानकारी गराइनेछ।
यसअघि ८० प्रतिशत खपत हुँदा जानकारी दिइन्थ्यो। साथै, प्याकको तथ्यांक वा समयावधि समाप्त भएपछि सेवा निरन्तर प्रयोग गरेमा मुख्य शेष रकमबाट शुल्क कट्ने व्यवस्था रहेको थियो।
यदि ग्राहकले नियमित शुल्क भुक्तानी सुविधा पहिले नै निष्क्रिय गरिसकेका छन् भने प्याक समाप्त भएपछि मुख्य शेष रकमबाट तथ्यांक सेवा सञ्चालन हुनेछैन। प्याक नलिई तथ्यांक चलाउन चाहने ग्राहकले भने यो सुविधा सक्रिय राख्न सक्नेछन्।
सरकारी निर्णयअनुसार कार्यान्वयन
नेपाल सरकार, मन्त्रिपरिषद्को २०८२ चैत १३ गतेको निर्णय तथा सञ्चार तथा सूचना प्रविधि मन्त्रालयको सुधारात्मक कार्ययोजनाअनुसार नियमित शुल्क भुक्तानी निष्क्रिय गर्ने विकल्प उपलब्ध गराइएको कम्पनीले जनाएको छ।
नेपाल टेलिकम अनुप्रयोगमार्फत सेवा
आगामी दिनमा नेपाल टेलिकम एप मार्फत पनि यो सुविधा सक्रिय वा निष्क्रिय गर्न सकिने व्यवस्था क्रमशः उपलब्ध गराइनेछ।
३० दिन समयावधिको नयाँ प्याक
प्रिपेड मोबाइलमा उपलब्ध प्याकेजहरूको समयावधि २८ दिनको सट्टा ३० दिन हुनुपर्ने ग्राहक मागअनुसार कम्पनीले ‘प्रिपेड कम्बो २९९’ नामक नयाँ प्याक सञ्चालनमा ल्याएको छ।
२९९ रुपैयाँमा उपलब्ध उक्त प्याकअन्तर्गत: सबै सञ्जालमा ३०० मिनेट कल, ४ जीबी डाटा, कम्पनीकै सञ्जालभित्र २० वटा सन्देश प्रयोग गर्न सकिनेछ।
आगामी दिनमा ३० दिन समयावधिका अन्य प्याकहरू पनि क्रमशः सञ्चालनमा ल्याइने कम्पनीले जनाएको छ।
