काठमाडौं । रास्वपाको केन्द्रीय समिति र संसदीय दलको बैठक भावी मन्त्रिपरिषद् गठनबारे कुनै औपचारिक छलफल नगरी सम्पन्न भएको छ। दुवै बैठकमा भावी प्रधानमन्त्रीका रूपमा प्रस्तावित बालेन साह मौन रहे।
सांसदहरूको शपथपछि पार्टी कार्यालय घन्टाघरमा बसेको केन्द्रीय समिति बैठकमा सभापति रवि लामिछानेले पूर्वसहमति अनुसार साहलाई संसदीय दलको नेताका रूपमा प्रस्ताव गरेका थिए। प्रस्तावलाई उपस्थित केन्द्रीय सदस्यहरूले समर्थन जनाउँदै अनुमोदन गरेका थिए। बैठक केही मिनेटमै सकिएको थियो।
त्यसपछि बसेको संसदीय दलको बैठकमा पनि उही प्रक्रिया दोहोरिएको थियो। लामिछानेले शाहलाई संसदीय दलको नेता तथा प्रधानमन्त्रीका उम्मेदवारका रूपमा प्रस्ताव गरेका थिए। प्रस्ताव सर्वसम्मत पारित भएको घोषणा गरिएको थियो। नेताहरूले एकअर्कालाई बधाई आदानप्रदान गरे पनि शाहले बैठकमा धारणा सार्वजनिक गरेनन्।
बैठकमा मन्त्री चयनबारे छलफल हुने अपेक्षा गरिए पनि उक्त विषयमा कुनै औपचारिक चर्चा नभएको सहभागीहरूले बताएका छन्। एक सांसदका अनुसार सभापतिले “जो मन्त्री भए पनि मिलेर काम गर्नुपर्ने” मात्र उल्लेख गरेका थिए।
शाह भोलि प्रधानमन्त्रीका रूपमा शपथ ग्रहण गर्ने कार्यक्रम तय भएको छ। सोही दिन मन्त्रीहरूको समेत सामूहिक शपथ गराउने तयारी रहेको जनाइएको छ। तर, मन्त्री बन्ने व्यक्तिहरूको नामबारे पार्टीभित्रै स्पष्टता नभएको नेताहरू बताउँछन्।
पार्टी स्रोतका अनुसार शीर्ष तहमा आन्तरिक परामर्श जारी रहेको र नामहरू अन्तिम चरणमा पुगेको दाबी गरिएको छ। मन्त्रीहरूको सूची औपचारिक रूपमा सार्वजनिक नभएसम्म अनिश्चितता कायम रहने देखिएको छ।
