विराटनगर । श्रम संस्कृति पार्टीले प्रतिनिधिसभातर्फ समानुपातिक प्रणालीबाट पठाउने चार जना सांसदको नाम टुंगो लगाएको छ। फागुन २१ गते सम्पन्न प्रतिनिधिसभा निर्वाचनमा पार्टीले समानुपातिकतर्फ ३ लाख ८५ हजार ९०२ मत प्राप्त गर्दै चार सिट सुरक्षित गरेको थियो।
पार्टीकी केन्द्रीय कोषाध्यक्ष समिता राईका अनुसार आदिवासी महिलातर्फ हेटौँडाकी मन्दिरा मोक्तान, खस आर्य महिलातर्फ अम्बिका सङ्ग्रौला, दलित कोटाबाट सुर्खेतकी राधिका रम्तेल र आदिवासी जनजातितर्फ पूर्व गोर्खा लाहुरे पूर्ण लिम्बूलाई समानुपातिक सांसदका रूपमा सिफारिस गर्ने निर्णय भएको छ।
समानुपातिक सूची टुंग्याउने विषयमा पार्टीभित्र केही समय मतभेद देखिएको थियो। खस आर्य कोटामा पहिलो नम्बरमा रहेका जीवन विष्टले विवादका बीच आफ्नो नाम बन्द सूचीबाट फिर्ता लिएको घोषणा गरेका थिए। उनले सामाजिक सञ्जालमार्फत पदका लागि विवाद गर्नु उपयुक्त नभएको उल्लेख गर्दै त्यागको उदाहरण प्रस्तुत गर्न खोजेको बताएका थिए।
विवाद उत्कर्षमा पुगेपछि पार्टी अध्यक्ष ले सामाजिक सञ्जालमा असन्तुष्टि जनाउँदै समानुपातिक विषयमा अनावश्यक दबाब दिनेहरूलाई कारबाही गर्ने चेतावनी दिएका थिए।
प्रतिनिधिसभा निर्वाचनमा पार्टीले प्रत्यक्षतर्फ तीन सिट जितेको छ । खोटाङ, भोजपुर र सुनसरी–१ मा विजय हासिल गर्दै पार्टीले राष्ट्रिय राजनीतिमा उपस्थिति बलियो बनाएको छ। समानुपातिकतर्फ थ्रेसहोल्ड पार गरेसँगै पार्टीले राष्ट्रिय दलको मान्यता पनि प्राप्त गरेको छ।
