काठमाडौँ । प्रतिनिधिसभा सदस्य निर्वाचनअन्तर्गत समानुपातिकतर्फको मतगणना सम्पन्न भएको छ । निर्वाचन आयोग का अनुसार १ करोड ७ लाख ३९ हजार ११५ मत सदर भएको छ । यही मतका आधारमा ११० समानुपातिक सिटको बाँडफाँट हुनेछ ।
कसरी हुन्छ सिट बाँडफाँट ?
प्रतिनिधिसभा सदस्य निर्वाचन ऐनअनुसार समानुपातिक प्रणालीमा थ्रेसहोल्ड (न्यूनतम ३ प्रतिशत मत) कटाएका दलहरूबीच मात्र सिट बाँडफाँट गरिन्छ ।
यसपटक ३ प्रतिशतभन्दा बढी मत ल्याउने ६ दल छन् :
राष्ट्रिय स्वतन्त्र पार्टी – ५१,३९,२३५ (४७.८६%)
नेपाली कांग्रेस – १७,४९,५८३ (१६.२९%)
नेपाल कम्युनिस्ट पार्टी (एमाले) – १४,४८,८५४ (१३.४९%)
नेपाल कम्युनिस्ट पार्टी – ८,०५,७७३ (७.५०%)
श्रम संस्कृति पार्टी – ३,७८,६४९ (३.५३%)
राष्ट्रिय प्रजातन्त्र पार्टी – ३,२९,४७२ (३.०७%)
३ प्रतिशतभन्दा कम मत ल्याएका दल (जसपा, जनमत लगायत) सिट बाँडफाँटमा सहभागी हुँदैनन् ।
‘भाजक’ र परिणाम
६ दलको कुल मत ९८,५१,५६६ हुन्छ । यसलाई ११० सिटले भाग गर्दा ८९,५६० मत ‘भाजक’ निर्धारण हुन्छ ।
पहिलो चरणको भागफल अनुसार :
रास्वपा – ५७ सिट
कांग्रेस – १९ सिट
एमाले – १६ सिट
नेकपा – ८ सिट
श्रम संस्कृति – ४ सिट
राप्रपा – ३ सिट
जोड्दा १०७ सिट हुन्छ । बाँकी ३ सिट ‘सबैभन्दा धेरै बाँकी मत’का आधारमा बाँडिन्छ ।
बाँकी मतको आधारमा थप १/१ सिट :
नेकपा
राप्रपा
कांग्रेस
अन्तिम समानुपातिक सिट
रास्वपा – ५७
कांग्रेस – २०
एमाले – १६
नेकपा – ९
श्रम संस्कृति – ४
राप्रपा – ४
नयाँ संसद्को अंकगणित
प्रत्यक्ष र समानुपातिक जोड्दा सम्भावित कुल सिट संख्या :
रास्वपा – १२५ + ५७ = १८२
कांग्रेस – १८ + २० = ३८
एमाले – ९ + १६ = २५
नेकपा – ८ + ९ = १७
श्रम संस्कृति – ३ + ४ = ७
राप्रपा – १ + ४ = ५
प्रतिनिधिसभामा कुल २७५ सिट छन् । दुई तिहाइ बहुमतका लागि १८४ सिट आवश्यक पर्छ ।
यस अनुसार रास्वपाको १८२ सिट पुग्ने देखिएकाले दुई तिहाइ बहुमतका लागि अझै २ सिट अपुग हुने अवस्था देखिएको छ ।
अन्तिम मतपरिणाममा सामान्य फेरबदल सम्भव भए पनि हालको प्रवृत्ति अनुसार संसद्को शक्ति–सन्तुलन यस्तै रहने देखिन्छ ।
