काठमाडौँ। आगामी फागुन २१ गते हुने प्रतिनिधिसभा निर्वाचनमा सिन्धुपाल्चोकमा नेपाली कम्युनिस्ट पार्टी (नेकपा) ले आफ्नो विरासत जोगाउने दाउ खेलेको छ । नेकपाले सिन्धुपाल्चोक–१ बाट माधव सापकोटा र सिन्धुपाल्चोक–२ बाट युवराज दुलाललाई उम्मेदवार बनाएको छ।
सिन्धुपाल्चोक–१ भने २०६४ देखि लगातार माओवादीको ‘जग’ रहेकाले सापकोटा विरासत जोगाउन दबाबमा छन्। अघिल्लो निर्वाचनमा माधवले कांग्रेसको समर्थनमा ३० हजार ४०८ मत ल्याएर विजयी भएका थिए। यसपालि एमाले, कांग्रेस, रास्वपा र राप्रपा समेत मैदानमा उत्रेका छन्, जसले प्रतिस्पर्धा कडा हुने संकेत गरेको छ।
सिन्धुपाल्चोक–२ बाट पहिलो पटक संघीय प्रतिनिधिसभा चुनाव लड्ने युवराज दुलाल १८ वर्षअघिको माओवादी विरासत फिर्ता ल्याउने दाउमा छन् । उनी प्रदेशसभा सदस्यबाट राजीनामा दिएर चुनावी मैदानमा आएका हुन्। यस क्षेत्रका प्रमुख प्रतिस्पर्धीमा एमालेका शेरबहादुर तामाङ, कांग्रेसका वंशलाल तामाङ, रास्वपा र राप्रपाका उम्मेदवार रहेका छन्।
स्थानीय तहको विगतको नतिजाले पनि क्षेत्रको राजनीतिक विभाजन स्पष्ट पार्दछ ।सिन्धुपाल्चोकमा कांग्रेस, एमाले र माओवादीबीच मतको बलियो प्रतिस्पर्धा भइरहे पनि माओवादीले आफ्नो विरासत र प्रभाव कायम राख्दै आएको छ।
सिन्धुपाल्चोकको दुईवटै क्षेत्र क्लिन स्विप गरेर पुरानो शक्ति र विरासत जोगाउने यस निर्वाचनमा नेकपाको रणनीति स्पष्ट रहेकाे छ ।
