काठमाडौं ।  आगामी राष्ट्रिय सभा सदस्य निर्वाचनका लागि १३ राजनीतिक दलले उम्मेदवारी प्रक्रियामा सहभागी हुने भएका छन्। निर्वाचन आयोगले दर्ताका लागि निवेदन दिएका सबै १३ दललाई स्वीकृति प्रदान गर्दै उनीहरूलाई निर्वाचन चिह्न समेत उपलब्ध गराएको छ।

आयोगले स्वीकृत दलहरूको मतपत्रमा रहने क्रम पनि निर्धारण गरेको छ। सोअनुसार पहिलोदेखि पाँचौँ स्थानसम्म क्रमश: नेकपा एमाले, नेपाली कांग्रेस, नेपाली कम्युनिष्ट पार्टी, राष्ट्रिय प्रजातन्त्र पार्टी र जनता समाजवादी पार्टी नेपाल रहनेछन्।

छैटौँ नम्बरपछि जनमत पार्टी, लोकतान्त्रिक समाजवादी पार्टी–नेपाल, नेपाल मजदुर किसान पार्टी, राष्ट्रिय जनमोर्चा, बहुजन शक्ति पार्टी र तराई–मधेश लोकतान्त्रिक पार्टीको क्रम तय गरिएको छ।

साथै नवदर्ता नागरिक उन्मुक्ति पार्टी, नेपाल र श्रम–संस्कृति पार्टीका निर्वाचन चिह्नहरू मतपत्रको अन्तिममा रहनेछन्। आयोगका अनुसार सबै १३ दलको निर्वाचन चिह्न सातै प्रदेशमा एकै प्रकार हुने छ।

आगामी फागुन २० गते राष्ट्रिय सभाका १९ सदस्यको कार्यकाल सकिन लागेका छन्। तीमध्ये वामदेव गौतम राष्ट्रपतिद्वारा मनोनित सदस्य भएकाले बाँकी १८ सिटका लागि निर्वाचन हुनेछ।

प्रदेश अनुसार कोटा यसरी तोकिएको छ:

कोशी प्रदेश : ३ सिट

मधेश प्रदेश : ४ सिट

बागमती प्रदेश : २ सिट

गण्डकी प्रदेश : २ सिट

लुम्बिनी प्रदेश : ३ सिट

कर्णाली प्रदेश: २ सिट

सुदूरपश्चिम प्रदेश : २ सिट

निर्वाचन आयोगले दलहरूको मतपत्रक्रम २०७९ सालको प्रतिनिधिसभा समानुपातिक मतका आधारमा निर्धारण गरिएको जनाएको छ।