काठमाडाैं । नयाँ बानेश्वरस्थित संसद् भवनको व्यवस्थापन गर्दै आएको विशिष्ट संरचना सञ्चालन तथा व्यवस्थापन विकास समितिले एकैपटक ८० कर्मचारी हटाएको छ । एकपक्षीय रूपमा कर्मचारीलाई निष्कासन गरेको भन्दै अन्तर्राष्ट्रिय सम्मेलन केन्द्र कर्मचारी संगठनले आन्दोलन गर्ने घोषणा गरेको छ ।
बुधबार प्रेस विज्ञप्ति निकाल्दै संगठनले निर्णय नसच्याए चरणबद्ध आन्दोलन गर्ने जनाएको हो । ‘यो निर्णय केवल कर्मचारीहरूको जीवन, रोजगारी र भविष्यमाथिको गम्भीर प्रहार मात्र नभई श्रम ऐन, करार सेवासम्बन्धी प्रचलित कानुन तथा श्रमजीवी वर्गका न्यूनतम अधिकारहरूको खुला उल्लंघन र प्राकृतिक न्यायको सिद्धान्तविपरीत छ,’ कर्मचारी संगठनका अध्यक्ष केशव कोइरालाद्वारा जारी विज्ञप्तिमा भनिएको छ, ‘कार्यालयको अन्यायपूर्ण र एकपक्षीय निर्णयलाई तुरुन्त फिर्ता गरी सम्बन्धित कर्मचारीलाई पूर्ववत् जिम्मेवारीमा पुनर्स्थापना गर्न जोडदार माग गर्दछ । साथै, भविष्यमा यस्ता घटना दोहोरिन नदिने स्पष्ट प्रतिबद्धतासमेत व्यवस्थापन पक्षले तत्काल जनाउनुपर्ने हाम्रो अडान छ ।’
कर्मचारीका हकहितविपरीत गरिएको निर्णय फिर्ता नगरेमा संगठन आन्दोलनका कार्यक्रमहरू चरणबद्ध रूपमा घोषणा गर्न बाध्य हुनेछ, जसको सम्पूर्ण जिम्मेवारी कार्यालय प्रमुखको हुने चेतावनीसमेत दिइएको छ ।
सहरी विकास मन्त्रालयअन्तर्गतको सो समितिले निकटस्थहरूलाई भर्ना गर्न पुराना कर्मचारी हटाएको आरोप लागेको छ । केन्द्रले अन्तर्राष्ट्रिय सम्मेलन केन्द्र र सनराइज सम्मेलन केन्द्रमा कार्यरत करारका कर्मचारीलाई नयाँ आर्थिक वर्ष सुरु भएलगत्तै हटाएको हो ।
