काठमाण्डौं  ।  चिकित्सा शिक्षा आयोगले यस स्नातक तहमा भर्ना हुन समापन म्याचिङको आवेदन खुल्ला गरेको छ। दोस्रो चरणको पुनः म्याचिको भर्ना पछि खुल्ला रहेका सिटका लागि आयोगले आवेदन मागेको हो।

स्नातक तहको गत मंसिरमा प्रकाशन गरिएको नतिजाको योग्यताक्रमा भएका विद्यार्थीले खाली रहेका सिटमा भर्नाका लागि आवेदन दिसक्नेछन्।  अन्य शैक्षिक कार्यक्रममा भर्ना नभएका, वैदेशिक छात्रवृत्तिमा छनोट नभएका तथा विदेश पढ्न जान अनुमति नलिएका विद्यार्थीले यसका आवेदन दिन पाउने छन्।

आयोगले दिएको विवरण अनुसार सबै कार्यक्रममा गरी १७४१ सिट खाली रहेको छ।  सबैभन्दा बढी विद्यार्थीको आकर्षण रहेको एमबीबीएसमा मात्रै ११७ सिट खाली रहेको छ। सबैभन्दा बढी वीरगन्जको नेशनल मेडिकल कलेजमा १८ सिट खाली रहेको छ। त्यसपछि जनकपुरस्थित जानकी मेडिकल कलेजमा १४ सिट र चितवन मेडिकल कलेजमा ११ सिट खाली छ।

विद्यार्थीको पहिलो रोजाइ रहने महाराजगन्ज चिकित्सा क्याम्पसमा ४ एमबीबीएस तर्फ ४ सिट खाली रहेको छ। बीएससी नर्सिङतर्फ ९२ सिट खाली रहेको आयोगको विवरणमा देखिन्छ। बीडीएसमा १५८ सिट खाली छ।

समापन म्याचिङमा आवेदन दिनका लागि फागुन ७ गतेसम्म समय  तोकिएको छ। छनोट उम्मेवारको सूची १० गते प्रकाशन हुने र १४ गते म्याचिङ हुनेछ।