चितवन / भरतपुरमा राष्ट्रियस्तरको एथलेटिक्स हुने भएको छ । चितवनको भरतपुर महानगरपालिका ६ देवनगर/चम्पानगर स्थित लेक ट्वान्टी थाउजेन्ड फार्म एण्ड रिट्रिट (एलटिके) हवेलीको आयोजनामा चैत १९ गते ‘ट्र्याक एण्ड फिल्ड २०७८’ हुने भएको हो ।
प्रतियोगितामा ट्र्याक एण्ड फिल्डका २८ वटा इभेन्ट हुनेछ । एथेलेटिक्सको उर्वर भूमि चितवनमा निजी क्षेत्रको लगानीमा राष्ट्रिय स्तरको प्रतियोगिता हुन लागेको एथलेटिक्सका पूर्व मुख्य प्रशिक्षक सुशील नरसिंह राणाले बताए । यसले चितवनमा राष्ट्रिय स्तरको एथलेटिक्स आयोजनामा जोड पुग्ने उनको भनाइ छ ।
चितवन जिल्ला एथ्लेटिक्स संघका अध्यक्ष मानबहादुर रजालीले निजी क्षेत्रले राष्ट्रिय स्तरको प्रतियोगिता आयोजना गर्दा खेलाडीहरुलाई उत्साह थप्ने बताए ।
एलटिकेका सञ्चालक देवेन लोहनीले खेल र पर्यटनलाई जोड्न प्रतियोगिता आयोजना गरिएको बताए । उनले प्रतियोगिताका लागि तयारी तिव्र गतिमा भइरहेको समेत जानकारी दिए ।
जुनियर छात्र तथा छात्रा र सिनियर महिला पुरुष खेलाडीले ट्र्याक एण्ड फिल्डका २८ इभेन्टमा प्रतिस्पर्धा गर्नेछन् । प्रतियोगितामा चितवनसहित बिभिन्न २० जिल्ला तथा तीन विभागीय टोली नेपाल प्रहरी, सशस्त्र प्रहरी बल (एपिएफ) र त्रिभुवन आर्मीका गरी तीन सय खेलाडी सहभागी हुनेछन् ।
जुनियर छात्र छात्रा तर्फ ६० मिटर, दुई सय मिटर, आठ सय मिटरका साथै लङ्गजम्प, सटपुट र तीन किलो मिटर क्रस कन्ट्रीमा स्पर्धा हुनेछ ।
यस्तै सिनियर महिला तथा पुरुषतर्फ ६० मिटर, दुई सय मिटर, चार सय मिटर, आठ सय मिटरका साथै लङ्गजम्प, सटपुट र आठ किलोमिटर क्रसकन्ट्रीमा स्पर्धा हुनेछ । भेटेरानतर्फ महिला तथा पुरुषको पाँच किलोमिटर क्रसकन्ट्रीको इभेन्ट पनि हुनेछ ।
प्रतियोगिताका सबै इभेन्टमा प्रथम हुनेले समान पाँच-पाँच हजार नदगसहित पदक प्राप्त गर्नेछ । दोस्रो र तेस्रो हुनेले क्रमश: नगद तीन हजार र दुई हजारसहित पदक प्राप्त गर्नेछन् । उत्कृष्ट खेलाडीले पनि पुरस्कार प्राप्त गर्ने आयोजकले जानकारी दिएको छ ।
प्रतियोगिता सम्पन्न गर्न २५ लाख ५० हजार खर्च हुने अनुमान गरिएको छ । भरतपुर ६ र १३ प्रतियोगिताको सह आयोजक हुन् । चितवन जिल्ला एथ्लेटिक्स संघले प्रतियोगिताका लागि प्राविधिक सहयोग गर्नेछ ।
