चितवन । रसुवा जिल्लाको भोटेकोशी नदीमा आएको विनाशकारी बाढीबाट प्रभावित व्यक्तिहरूको खोज, उद्धार तथा राहत व्यवस्थापनका लागि भरतपुर महानगरपालिका–४ स्थित प्रगति महिला समूह ले प्रधानमन्त्री दैवी प्रकोप उद्धार कोषमा रु. १ लाख १ हजार सहयोग गरेको छ।
२०८३ साल भदौ १० गते भोटेकोशी नदीमा आएको बाढीबाट ठूलो जनधनको क्षति भएको तथा धेरै व्यक्ति प्रभावित भएको अवस्थामा पीडितहरूको उद्धार, राहत तथा पुनःस्थापनामा सहयोग पुर्याउने उद्देश्यले समूहले उक्त रकम प्रदान गरेको हो। प्रगति महिला समूह भरतपुर महानगरपालिका वडा नं. ४, शिव पञ्चायन टोल विकास संस्थाको वडामा पहिलोपटक सूचीकृत महिला समूहका रूपमा सामाजिक तथा मानवीय कार्यमा सक्रिय रहँदै आएको छ।
समूहकी अध्यक्ष लक्ष्मी नारायणी कडेलका अनुसार विपद्को समयमा पीडित तथा प्रभावित नागरिकलाई सहयोग गर्नु प्रत्येक सामाजिक संघसंस्थाको मानवीय मूल्य र सामाजिक उत्तरदायित्वअन्तर्गत पर्ने महत्वपूर्ण दायित्व हो। यही भावनाअनुसार समूहले आफ्नो तर्फबाट सक्दो सहयोग गरेको उहाँले बताउनुभयो।
“विपद् कुनै व्यक्ति, परिवार वा समुदायको मात्र समस्या होइन, यस्तो समयमा सबैले आफ्नो क्षमताअनुसार हातेमालो गर्नुपर्छ,” अध्यक्ष कडेलले भन्नुभयो। बाढीका कारण आफन्त गुमाएका परिवार, घाइते तथा विस्थापित नागरिकको पीडामा केही भए पनि मल्हम लगाउन सहयोग रकम प्रदान गरिएको उहाँको भनाइ छ। प्रगति महिला समूहले सहयोग रकम प्रदान गर्नुका साथै बाढीबाट प्रभावित तथा पीडित परिवारप्रति गहिरो दुःख व्यक्त गरेको छ।
समूहकी अध्यक्ष एवं भरतपुर महानगरपालिका वडा नं. ४ को महिला सञ्जालकी उपाध्यक्षसमेत रहनुभएकी सामाजिक व्यक्तित्व कडेलले विज्ञप्तिमार्फत बाढीमा परी ज्यान गुमाएका व्यक्तिहरूप्रति भावपूर्ण श्रद्धाञ्जली अर्पण गर्नुभएको छ। त्यस्तै, शोकसन्तप्त परिवारजन तथा पीडित आफन्तप्रति हार्दिक समवेदना व्यक्त गर्दै उहाँले घाइतेहरूको शीघ्र स्वास्थ्यलाभको कामनासमेत गर्नुभएको छ।
विपद्को यस घडीमा प्रभावित परिवारलाई एक्लो महसुस हुन नदिन राज्य, स्थानीय तह, सामाजिक संघसंस्था, निजी क्षेत्र तथा आम नागरिक सबैले सहयोग र सहकार्य गर्नुपर्ने उहाँको धारणा छ। प्राकृतिक विपद्का बेला तत्काल उद्धार र राहतसँगै प्रभावित परिवारको दीर्घकालीन पुनःस्थापनालाई समेत प्राथमिकतामा राख्नुपर्ने आवश्यकता रहेको सामाजिक क्षेत्रका व्यक्तिहरूले बताउँदै आएका छन्।
बाढीपहिरोजस्ता विपद्बाट हुने मानवीय तथा भौतिक क्षति न्यूनीकरणका लागि पूर्वतयारी, उद्धार क्षमता अभिवृद्धि र प्रभावकारी समन्वय आवश्यक देखिन्छ। प्रगति महिला समूहको यो सहयोगले विपद्मा सामाजिक संस्थाहरूले निर्वाह गर्नुपर्ने जिम्मेवारी र मानवीय सेवाको भावनालाई उजागर गरेको छ।
समूहले आगामी दिनमा पनि समुदाय तथा विपद्मा परेका नागरिकको सहयोगका लागि आफ्नो तर्फबाट निरन्तर सामाजिक गतिविधि सञ्चालन गर्ने जनाएको छ। विपद्को समयमा प्रदान गरिएको आर्थिक सहयोगले तत्काल राहत तथा उद्धार कार्यमा योगदान पुर्याउनुका साथै पीडित परिवारलाई आफूहरूप्रति समाजको साथ र सहयोग रहेको अनुभूति गराउने अपेक्षा गरिएको छ।
सामाजिक उत्तरदायित्वलाई व्यवहारमा उतार्दै प्रगति महिला समूहले गरेको रु. १ लाख १ हजार सहयोग मानवीय सेवाको महत्वपूर्ण उदाहरण बनेको छ।
