काठमाडौं। शिक्षा तथा खेलकुद प्रविधि मन्त्रालयले प्राविधिक शिक्षा तथा व्यावसायिक तालिम परिषद् (सिटिइभिटि) को एकेडेमिक काउन्सिलमा सूचना प्रविधि, उद्योग, स्टेम शिक्षा तथा नर्सिङ–जनस्वास्थ्य क्षेत्रका चार जना विज्ञलाई सदस्यका रूपमा मनोनयन गरेको छ।
मन्त्रालयले सूचना प्रविधि तथा डिजिटल नीति विज्ञ डा. अमृता शर्मा, नेपाल उद्योग परिसंघका अध्यक्ष वीरेन्द्रराज पाण्डे, कारखानाका सहसंस्थापक तथा स्टेम शिक्षा विज्ञ डा. दीपेश्वरमान श्रेष्ठ र नर्सिङ तथा जनस्वास्थ्य क्षेत्रकी विज्ञ प्रमिला रानालाई काउन्सिल सदस्यमा नियुक्त गरेको हो।
सिटिइभिटिको एकेडेमिक काउन्सिल परिषद्को शैक्षिक तथा प्राज्ञिक नेतृत्व गर्ने प्रमुख निकाय हो। काउन्सिलले पाठ्यक्रम विकास, नयाँ कार्यक्रम स्वीकृति, शैक्षिक गुणस्तर सुनिश्चितता, मूल्याङ्कन प्रणाली तथा प्राविधिक एवं व्यावसायिक शिक्षासम्बन्धी दीर्घकालीन नीतिगत दिशानिर्देशनमा भूमिका निर्वाह गर्दै आएको छ।
मन्त्रालयका अनुसार सूचना प्रविधि, उद्योग, स्टेम शिक्षा तथा स्वास्थ्य क्षेत्रका अनुभवी व्यक्तित्वहरूको सहभागिताले काउन्सिललाई बहुआयामिक विशेषज्ञता प्रदान गर्ने अपेक्षा गरिएको छ। साथै, प्राविधिक तथा व्यावसायिक शिक्षालाई आधुनिक प्रविधि, उद्योगको आवश्यकता, नवप्रवर्तन तथा श्रम बजारसँग थप प्रभावकारी रूपमा जोड्दै गुणस्तरीय र रोजगारमुखी शिक्षा प्रणाली विकासमा सहयोग पुग्ने विश्वास गरिएको छ।
मनोनीत सदस्यहरूमध्ये डा। अमृता शर्मा सूचना प्रविधि, डिजिटल रूपान्तरण र सार्वजनिक नीतिका क्षेत्रमा सक्रिय अनुसन्धानकर्ता तथा नीतिगत विज्ञ छन्।
वीरेन्द्रराज पाण्डे उद्योग तथा पूर्वाधार क्षेत्रका अनुभवी उद्यमी हुन् भने डा. दीपेश्वरमान श्रेष्ठले स्टेम शिक्षा, नवप्रवर्तन र व्यावहारिक सिकाइको प्रवर्द्धनमा योगदान दिँदै आएको छन्। त्यसैगरी, प्रमिला रानाले नर्सिङ तथा जनस्वास्थ्य क्षेत्रमा लामो अनुभव हासिल गरेको छन्।
