चितवन — बालकुमारी कलेजद्वारा सञ्चालन गरिएको MBA-FM (११औँ ब्याच) को अभिमुखीकरण कार्यक्रम आज भव्य तथा शैक्षिक गरिमामय वातावरणमा सम्पन्न भएको छ।
शैक्षिक सत्र २०८२/०८३ अन्तर्गत आयोजित उक्त कार्यक्रम Bharatpur Garden Resort मा कलेज व्यवस्थापन समितिका अध्यक्ष श्री प्रमोद कुमार श्रेष्ठको सभापतित्वमा सम्पन्न भएको हो। कार्यक्रमका प्रमुख अतिथि प्रा. डा. महानन्द चालिसे रहनुभएको थियो भने विशेष अतिथिका रूपमा प्रा. डा. दिल्लीराज शर्मा, प्रा. डा. मनोज कुमार चौधरी तथा पूर्व क्याम्पस प्रमुख एवं कलेज व्यवस्थापन समितिका सदस्य प्रा. शिव प्रसाद पौडेलको उपस्थिति रहेको थियो।
कार्यक्रममा कलेजकी उप क्याम्पस प्रमुख प्रवीना श्रेष्ठ, उप क्याम्पस प्रमुखहरू गुण्डराज क्षेत्री र भीमनारायण उपाध्याय, साथै प्राध्यापकहरू बलबहादुर थापा, उज्ज्वल पौडेल, रमेश्वर न्यौपाने, गोविन्दा ढुंगाना र नवीन श्रेष्ठको उल्लेखनीय उपस्थिति रहेको थियो। प्रमुख प्रशासनिक अधिकृत चन्द्रकान्त पौडेल, लेखा प्रमुख विष्णुलाल श्रेष्ठ तथा कर्मचारी बिन्दु पौडेलको समेत कार्यक्रममा सहभागिता रहेको थियो।
कार्यक्रमको प्रारम्भमा कलेजका उप क्याम्पस प्रमुख डा. सुशील घिमिरेले प्रमुख अतिथि, विशेष अतिथि, प्राध्यापकहरू तथा नवप्रवेशी विद्यार्थीहरूलाई स्वागत मन्तव्य व्यक्त गर्नुभएको थियो। स्वागत मन्तव्यका क्रममा उहाँले कलेजले व्यवस्थापन शिक्षामा गुणस्तरीय शैक्षिक वातावरण निर्माण गर्दै आएको उल्लेख गर्दै विद्यार्थीहरूलाई अध्ययनसँगै अनुशासन, अनुसन्धान तथा सिर्जनशीलतामा जोड दिन आग्रह गर्नुभयो।
त्यसपछि MBA-FM कार्यक्रम संयोजक श्री शिव प्रसाद सापकोटाले कार्यक्रमको शैक्षिक संरचना, अध्यापन पद्धति, मूल्याङ्कन प्रणाली तथा नियामकीय व्यवस्थासम्बन्धी विस्तृत जानकारी प्रस्तुत गर्नुभएको थियो। उहाँले MBA-FM कार्यक्रमले विद्यार्थीहरूलाई व्यवस्थापन तथा वित्तीय क्षेत्रका व्यावहारिक ज्ञान र सीप प्रदान गर्ने विश्वास व्यक्त गर्नुभयो। साथै, अध्ययन अवधिभर विद्यार्थीहरूले अनुसन्धान, प्रस्तुतीकरण, समूहगत कार्य तथा परियोजनामूलक शिक्षण प्रक्रियामा सक्रिय सहभागिता जनाउनुपर्नेमा जोड दिनुभयो।
विद्यार्थीहरूको तर्फबाट प्रतिनिधिमूलक मन्तव्य व्यक्त गर्दै श्री सुदीप थापलियाले कलेजप्रति विश्वास व्यक्त गर्दै नयाँ शैक्षिक यात्रालाई उपलब्धिमूलक बनाउने प्रतिबद्धता जनाउनुभयो। उहाँले विद्यार्थीहरूलाई प्रदान गरिएको शैक्षिक वातावरण, अनुभवी प्राध्यापकहरूको मार्गदर्शन तथा व्यवस्थापन पक्षको सहयोगले अध्ययनलाई थप प्रभावकारी बनाउने विश्वास व्यक्त गर्नुभयो। कार्यक्रममा बोल्दै प्रमुख अतिथि प्रा. डा. महानन्द चालिसेले वर्तमान समयको व्यवस्थापन शिक्षामा अनुशासन, अनुसन्धानमुखी सोच तथा व्यावसायिक नैतिकताको महत्त्व अत्यन्तै आवश्यक रहेको बताउनुभयो। उहाँले विद्यार्थीहरूलाई केवल सैद्धान्तिक शिक्षामा सीमित नरही व्यावहारिक ज्ञान, नेतृत्व क्षमता तथा सामाजिक उत्तरदायित्व विकास गर्न आग्रह गर्नुभयो।
साथै, शैक्षिक तथा अतिरिक्त क्रियाकलापमा सक्रिय सहभागिताले व्यक्तित्व विकासमा महत्वपूर्ण भूमिका खेल्ने धारणा व्यक्त गर्नुभयो। विशेष अतिथि प्रा. डा. दिल्लीराज शर्माले समकालीन विश्व परिवेशमा वित्तीय व्यवस्थापन सीपको आवश्यकता दिनप्रतिदिन बढ्दै गएको उल्लेख गर्दै दक्ष र जिम्मेवार व्यवस्थापक उत्पादन गर्न MBA-FM कार्यक्रम प्रभावकारी हुने विश्वास व्यक्त गर्नुभयो। त्यस्तै, प्रा. डा. मनोज कुमार चौधरीले भावी व्यवस्थापकहरूमा नवप्रवर्तन, समालोचनात्मक सोच तथा नेतृत्व क्षमताको विकास अपरिहार्य रहेको धारणा राख्नुभयो।
उहाँले प्रतिस्पर्धात्मक विश्व बजारमा सफल हुन विद्यार्थीहरूले समयानुकूल ज्ञान र प्रविधिसँग आफूलाई अद्यावधिक गर्दै लैजानुपर्नेमा जोड दिनुभयो। कार्यक्रममा कलेजका क्याम्पस प्रमुख श्री कुलचन्द्र पण्डितले धन्यवाद ज्ञापन गर्दै कलेजको समग्र शैक्षिक वातावरण, अनुशासन, अनुसन्धान तथा विद्यार्थीमैत्री अवसरहरूको बारेमा जानकारी गराउनुभयो। उहाँले विद्यार्थीहरूलाई अध्ययनप्रति समर्पित रहँदै आफ्नो लक्ष्य प्राप्तिका लागि निरन्तर प्रयासरत रहन प्रेरित गर्नुभयो।
कार्यक्रमको समापन सभापति श्री प्रमोद कुमार श्रेष्ठले प्रमुख अतिथि, विशेष अतिथि, प्राध्यापकहरू तथा सहभागी सम्पूर्णप्रति आभार व्यक्त गर्दै गर्नुभएको थियो। उहाँले कलेजले गुणस्तरीय व्यवस्थापन शिक्षा प्रदान गर्दै दक्ष जनशक्ति उत्पादनमा महत्वपूर्ण भूमिका निर्वाह गरिरहेको उल्लेख गर्नुभयो।
कार्यक्रमको सञ्चालन तथा सहजीकरण MBA-FM कार्यक्रम संयोजक श्री शिव प्रसाद सापकोटाले गर्नुभएको थियो। कार्यक्रम उत्साहपूर्ण, जानकारीमूलक तथा विद्यार्थीहरूका लागि प्रेरणादायी बनेको सहभागीहरूले बताएका छन्।
