काठमाडौं । नेपाली कम्युनिस्ट पार्टी (नेकपा)ले नवनियुक्त प्रधानमन्त्री बालेन (बालेन्द्र) साहलाई बधाई तथा शुभकामना व्यक्त गरेको छ।
फागुन २१ गते सम्पन्न प्रतिनिधि सभा निर्वाचनबाट बहुमत प्राप्त गरी प्रधानमन्त्री नियुक्त भएका शाह र उनको नेतृत्वमा गठित मन्त्रिपरिषद्को सफल कार्यकालको कामना गरिएको पार्टीद्वारा जारी विज्ञप्तिमा उल्लेख छ। शनिबार केन्द्रीय कार्यालय कोटेश्वरबाट जारी प्रेस विज्ञप्तिमा शुभकामना व्यक्त गरिएको हो।
बधाईसँगै नेकपाले सरकारको पहिलो मन्त्रिपरिषद् बैठकबाट भएको एक निर्णयप्रति भने गम्भीर ध्यानाकर्षण जनाएको छ। भदौ २३ र २४ गतेको घटनाको छानबिन गर्न गठित कार्की आयोगको प्रतिवेदन कार्यान्वयन गर्ने सन्दर्भमा सरकारले चालेको कदमप्रति पार्टीले प्रश्न उठाएको हो।
केन्द्रीय कार्यालयका तर्फबाट गणेशमान पुनद्वारा हस्ताक्षरित विज्ञप्तिमा विधिको शासन, कानुनी प्रक्रिया र निष्पक्षताको मान्यता उल्लंघन नहोस् भन्ने आग्रह गरिएको छ। राजनीतिक पूर्वाग्रह नराख्न तथा द्वन्द्व निम्त्याउने कार्य नगर्न सरकारलाई सचेत गराइएको छ।
शुक्रबार बसेको मन्त्रिपरिषद् बैठकले कार्की आयोगको सुझावअनुसार राजनीतिक नेतृत्वविरुद्ध कारबाही प्रक्रिया अघि बढाउने निर्णय गरेको थियो। सो निर्णयपछि तत्कालीन प्रधानमन्त्री तथा एमाले अध्यक्ष केपी शर्मा ओली र कांग्रेस नेता तथा पूर्वगृहमन्त्री रमेश लेखक पक्राउ परेका छन्।
पक्राउपछि एमालेले देशव्यापी विरोध कार्यक्रम घोषणा गरेको छ। नेकपाले भने कसैको नाम उल्लेख नगरी सरकारको कदमप्रति ध्यानाकर्षण भएको जनाएको छ।
