काठमाडौँ । भदौ २३ र २४ गते भएका घटनाको छानबिन गर्न गठित आयोगमा उपस्थित भई पूर्वगृहमन्त्री रमेश लेखकले सोमबार आफ्नो लिखित धारणा पेस गरेका छन्।
आयोगको सचिवालयले उपलब्ध गराएको लिखित धारणा अनुसार लेखकले प्रदर्शनका क्रममा बल प्रयोग गर्न आफूले कुनै आदेश नदिएको दाबी गरेका छन्।
उनले भदौ २२ गते केन्द्रीय सुरक्षा समितिको बैठक बसेर ‘कुनै हताहती नहोस्’ भन्दै संयमता अपनाउन निर्देशन दिएको उल्लेख गरेका छन्। तर जेनजी आन्दोलनकारीको भेषमा आएका लोकतन्त्रविरोधी तत्त्वले जेनजीको शान्तिपूर्ण प्रदर्शनलाई ‘हाइज्याक’ गरी हिंसात्मक बनाएको उनको जिकिर छ।
लेखकले आयोगलाई बुझाएको जवाफमा गृहमन्त्रीले नीतिगत निर्देशन मात्र दिने र अपरेसनल कमान्ड सुरक्षा अधिकारीकै हातमा हुने स्पष्ट पारेका छन्। गोली चलाउने वा बल प्रयोग गर्ने आदेश आफूले नदिएको उनले दोहोर्याएका छन्।
राज्यका प्रमुख अङ्गहरूमाथि भएको आक्रमणलाई उनले लोकतन्त्र समाप्त पार्ने सुनियोजित षड्यन्त्रको संज्ञा दिएका छन्। घटनामा युवाहरूको ज्यान गएपछि आफू मर्माहत भई नैतिकताको आधारमा तत्काल पदबाट राजीनामा दिएको पनि उनले स्मरण गराएका छन्।
