काठमाडौँ । नेपाली कांग्रेसका सभापति शेरबहादुर देउवाले आफ्नो स्वास्थ्य अवस्थाको कारण देखाउँदै उपसभापति पूर्णबहादुर खड्कालाई कार्यवाहक सभापतिको जिम्मेवारी दिएका छन्।
मंगलबार पार्टी केन्द्रीय कार्यालय सानेपामा बसेको केन्द्रीय समिति बैठकलाई सम्बोधन गर्दै देउवाले उक्त घोषणा गरेका हुन्।
देउवाले पार्टीका नेता–कार्यकर्तालाई एकताबद्ध हुन आग्रह गर्दै भने, “घरमा सधैं एकै जना मूली रहँदैन, पार्टीमा पनि हमेसा एकै जना सभापति रहिरहँदैन। १५औँ महाधिवेशनबाट पार्टी नेतृत्व विधिवत् रूपमा हस्तान्तरण गर्छु।”
देउवाको यस घोषणासँगै कांग्रेसभित्र नेतृत्व हस्तान्तरण र आगामी महाधिवेशनबारे व्यापक चर्चा सुरु भएको छ।
विधान अनुसार देउवा नेतृत्वको १४औँ महाधिवेशनबाट निर्वाचित कार्यसमितिको म्याद आगामी मंसिर मसान्तमा सकिँदैछ। विधानले केन्द्रीय कार्यसमितिलाई एक वर्ष म्याद थप्ने अधिकार दिएको छ। तर, पार्टीभित्र अहिले महामन्त्री गगन थापा र विश्वप्रकाश शर्माले विशेष महाधिवेशनको माग गर्दै हस्ताक्षर संकलन गरिरहेका छन्।
त्यस्तै, डा. शेखर कोइराला नेतृत्वको समूहले मंसिर मसान्तभित्र नियमित महाधिवेशन गर्नुपर्ने अडान लिएको छ। संस्थापन पक्षले भने “विधि र प्रक्रिया पूरा गर्न समय नपुग्ने भएकाले केही समय थप्नुपर्ने” धारणा अघि सारेको छ।
बैठकपछि कांग्रेस केन्द्रीय सदस्य उदयशमशेर राणाले भने, “सभापतिज्यूले कार्यवाहक तोक्दै महाधिवेशनको कार्यतालिका बनाउन र निर्वाचनको तयारी थाल्न निर्देशन दिनुभएको छ। अब जिम्मेवारी कार्यवाहक र पदाधिकारीहरूको काँधमा आएको छ।”
त्यस्तै, कांग्रेस प्रवक्ता डा. प्रकाशशरण महतले देउवाले नेतृत्व हस्तान्तरणको घोषणा गरिसकेपछि पनि केही नेताहरूले अनावश्यक रूपमा प्रश्न उठाएको भन्दै असन्तुष्टि जनाए।
उता, महामन्त्री थापा समूहकी केन्द्रीय सदस्य प्रतिमा गौतमले भने कार्यवाहक तोकिँदैमा महाधिवेशन मिति सार्न नहुने बताउँदै भनिन्, “हाम्रो अडान मंसिरमै महाधिवेशन हुनुपर्छ भन्ने नै हो।”
हाल संस्थापन पक्षले महाधिवेशन गर्ने तर समय केही सार्नुपर्ने, विपक्षी पक्षले भने मंसिरमै गर्नुपर्ने अडान लिएको छ। देउवाले कार्यवाहक तोकेसँगै अब कांग्रेसभित्र नेतृत्वको बाटो र एकताको समीकरण कस्तो बन्छ भन्ने विषयमा सबैको नजर केन्द्रित भएको छ।
