काठमाडौं । सप्तकोशी नदीमा पानीको बहाब यस वर्षकै उच्च स्तरमा पुगेको छ। कोशी ब्यारेजमा गरिएको पछिल्लो मापन अनुसार आइतबार बिहान ८ बजेको अवस्थासम्म प्रति सेकेन्ड ३ लाख ३५ हजार ३६० क्यूसेक पानी बगिरहेको छ।
नेपाल–भारत सिमानास्थित कोशी ब्यारेजमा अहिले ५० वटा ढोका खोलिएका छन्। पानीको सतह लगातार बढ्दो क्रममा रहेकाले नदी आसपासका क्षेत्रलाई उच्च सतर्कता अपनाउन प्रशासनले आग्रह गरेको छ।
जिल्ला प्रहरी कार्यालय सुनसरीका अनुसार सप्तकोशीमा पानीको बहाब बढेपनि हालसम्म नदी कटान वा ठूला क्षतिको समाचार भने आएको छैन। “अहिले नदीको बहाब तीव्र गतिमा बढिरहेको छ, तर कटानको जोखिम भने तत्काल देखिएको छैन,” प्रहरीका एक अधिकारीले जानकारी दिए।
जल तथा मौसम पूर्वानुमान महाशाखाका अनुसार पछिल्ला तीन दिनदेखि पूर्वी पहाडी र तराई क्षेत्रमा लगातार वर्षा भइरहेकाले कोशीमा पानीको मात्रा असामान्य रूपमा बढेको हो।
ब्यारेज नजिकैका बस्ती — श्रीपुर, हरिपुर, लौकही, र कर्जन्हा — का बासिन्दालाई सावधानी अपनाउन र सतर्क रहन अनुरोध गरिएको छ। प्रशासनका अनुसार यदि वर्षा यही दरमा जारी रहेमा ब्यारेजका सबै ढोका खोल्नुपर्ने अवस्था आउन सक्ने छ।
